O estudo de FETE-UXT entre docentes da Educación Secundaria tamén subliña que o elevado número de alumnos por aula contribúe a aumentar a tensión dos docentes.
Os profesores de Secundaria quéixanse da falta de apoio dos pais cando se expoñen problemas disciplinarios. Para máis do 29% esta é a fonte de tensión máxima na súa vida laboral (8-10 na escala de percepción), pero se se suma a cifra daqueles que a valoran como un factor de incidencia medio-alto ou alto, o dato ascende ao 54,8% dos enquisados.
A falta de respaldo dos pais cando xorden problemas de disciplina, o ensinar a persoas que non valoran a educación ou o ter que impartir clase a un grupo cun elevado número de alumnos son algúns dos factores que máis tensión lle produce ao profesorado de Educación Secundaria, segundo revela un estudo realizado por FETE-UXT.
O maior nivel de incidencia desta situación atópase entre o colectivo feminino, os individuos de 20 a 30 anos de idade, os centros de titularidade privada-concertada, entre aqueles que teñen máis de 50 traballadores e nos docentes cuxa experiencia laboral é inferior a tres anos.
O informe recolle unha porcentaxe acumulada do 47,9% de docentes que perciben que o ensino a persoas que non valoran o seu esforzo supón valores medios-altos de tensión no traballo. Outra importante fonte de ameaza para o docente constitúeo o feito de ter que impartir clase a un grupo cun elevado número de alumnos. Para un 47% esta circunstancia dá lugar a un elevado nivel de preocupación. Con todo, existe un amplo segmento de docentes para os cales este factor non supón
problema algún.
Para un de cada catro docentes, presenciar as agresións entre alumnos é causa dunha tensión máxima, cifra que case alcanza o 50% se se acumulan os valores de tensión media-alto e alto. As agresións verbais por parte dos alumnos tamén suscitan tensións entre o profesorado. Case a metade deles (o 48,5%) ven afectados por estes comportamentos, que perciben como unha fonte importante de tensión. A isto hai que sumar as desconsideracións que reciben por parte dos alumnos, algo que un 45% sitúa nun nivel medio-alto ou alto.
Para a realización do estudo enviáronse cuestionarios a 1.125 traballadores de ensino secundario, realizáronse entrevistas personalizadas a unha trintena de directores e profesores de centros docentes e constituíronse diversos grupos de discusión. Ademais de descubrir os principais factores que producen ansiedade no profesorado, a investigación estudou tamén o que se coñece como a síndrome do queimado (burnout) e as distintas estratexias coas que afrontar estes problemas.
O informe completo na web da FETE-UGT: Estrés no sector do ensino secundario (.pdf)
