Ventilar as habitacións ou fumar fóra do cuarto dos cativos non abonda para protexelos.
O tabaquismo pasivo é a primeira causa evitable de morte nos países desenvolvidos durante a infancia. Así de contundente o subliñan os investigadores que asinan un recente informe sobre o tema publicado na revista BMC Public Health. Ata o triplo de nicotina foi rexistrado en cativos que conviven con pais ou nais fumadores, segundo o informe coordinado desde o Departamento de Saúde da Generalitat de Cataluña.
Para chegar a esta conclusión, os científicos peneiraron os datos de máis dun milleiro de bebés de menos de ano e medio cun proxenitor, ou os dous, fumador. Analizaron mostras de cabelo de 250 cativos para determinar niveis de nicotina e fixeron varias visitas de seguimento aos fogares. Os datos reflicten a vulnerabilidade dos menores e indican que as partículas nocivas do tabaco que impregnan pel, roupa ou cabelos das nais e pais fumadores acaban pasando aos cativos.
Tamén en Botóns: Tabaco, a mellor prevención: o exemplo
