Libros de texto e adaptacións de obras de recoñecidos autores da literatura galega, como Xosé Luís Méndez Ferrín, Fina Casalderrey, Rosa Aneiros e Carlos Casares.
A Organización Nacional de Cegos Españois (ONCE) continúa estendendo o catálogo de recursos educativos dispoñibles en lingua galega para as persoas cegas e con discapacidade visual. O traballo realízase ao abeiro dun convenio coa Secretaría Xeral de Política Lingüística. Deste xeito, no que vai de ano, foron adaptados ao sistema de lectura Braille e ao sistema de gravación Daisy un total de 32 volumes. A adaptación vaise realizando ao fío das propias solicitudes dos afiliados e afiliadas da ONCE na delegación territorial de Galicia.
Os novos materiais inclúen libros de texto para diversas materias dos niveis de ensino de educación primaria, educación secundaria obrigatoria e bacharelato. Ademais, no que vai de ano fíxose tamén transcrición, gravación e adaptación de obras da literatura galega: Arraianos, de Xosé Luís Méndez Ferrín; O sol do verán, de Carlos Casares; A pomba e o degolado, de Fina Casalderrey; Ás de bolboreta, de Rosa Aneiros; e Alén da desventura, de Xavier Alcalá, entre outras.
