As alerxias alimentarias duplicáronse nos últimos vinte anos mentres existe déficit de especialistas para o seu tratamento na sanidade pública.
Son datos que se puxeron sobre a mesa durante a presentación esta semana en Barcelona do Simposio Internacional sobre Alerxias Alimentarias, organizado pola Sociedade Española de Alergoloxía e Inmunoloxía Clínica.
Os promotores expuxeron a súa preocupación pola falta de especialistas na sanidade pública e advertiron da propia carencia en materia de formación nas facultades de Medicina. Unhas cifras que contrastan co alto índice de alerxias entre a poboación (arredor do 25-30% da cidadanía sofre de alerxia dalgún tipo). Os especialistas subliñan especialmente a necesidade de inxectar recursos no ámbito da pediatría, destacando que o 6% dos alérxicos son menores de 4 anos con intolerancia a diversos alimentos.
Os alergólogos salientan ademais a mellora das técnicas e tratamentos, indicando como as novas técnicas de alergoloxía molecular permiten o deseño específico da vacina máis idónea para cada un dos pacientes. Mais, aínda nese contexto, os investigadores consideran que a nivel estatal o 50% dos alérxicos non seguen tratamentos, ou non os seguen correctamente.