Comeza a andar cara ao mes de maio esta iniciativa a prol do galego promovida pola Mesa, CIG-Ensino e a AS-PG.
“Galego, todo o que buscas!” é lema en 2012 da convocatoria do Correlingua.
“Outra vez para sumar un día máis na memoria dos adultos futuros que un día lembrarán que participaron nunha festa en que a música, o teatro, a maxia… falaban galego”
As festas finais do Correlingua, que terán lugar durante a primeira metade do mes de maio, están precedidas de distintas iniciativas lúdico-educativas para traballar na aula. Concursos de vídeo e banda deseñada e o exitoso Cantalingua, concurso do que sairán os grupos e solistas favoritos para actuaren nas festas finais do mes de maio.
Ademais, este ano achegarase a todas as carreiras que se desenvolvan no país o Galeoke, o videoxogo que nos permite divertírmonos intepretando, ao xeito de cada quen, algúns dos temas máis coñecidos da música galega dos últimos anos.
Como nas edicións anteriores, as festas finais que se celebrarán durante a primeira quincena do mes de maio en vilas e cidades de toda Galiza virán precedidas de toda unha serie de actividades lúdico-educativas que procuran traballar o Correlingua na aula, favorecendo a implicación activa de todo o alumnado xa desde o primeiro momento.
Como en anos anteriores, póñense en andamento os concursos para a elaboración do manifesto do Correlingua 2012, ao que se dará lectura en todas as festas finais, e o de banda deseñada, especificamente dirixido ao alumnado de Educación Infantil e Primaria. Tamén terá continuidade o concurso de vídeos iniciado na edición do ano pasado.
Co apoio dalgúns concellos e deputacións, “mais sobre todo grazas ao esforzo, compromiso e apoio de todas as comunidades educativas que cada ano participades na iniciativa”, comeza a actividade escolar máis numerosa de cantas se celebran no país, por alumnado e número de centros implicados: bota a andar o Correlingua 2012!
