Iniciativa da Fundación Luís Seoane para achegar conceptos de arquitectura e urbanismo de xeito lúdico.
Nenoarquitectura é un curso dirixido a nenos de idades comprendidas entre os 6 e os 9 anos que pretender dar a coñecer conceptos de arquitectura e urbanismo de xeito lúdico a través do Sistema de Construción Lupo.
O curso Nenoarquitectura constará de oito sesións, das que catro formarán parte do ciclo “Sen moverte do sofá” realizado en colaboración co Colexio Oficial de Arquitectos de Galicia. Nestas sesións os nenos comunicaranse con outros compañeiros de diferentes cidades en colaboración con outros equipos didácticos que traballarán en simultáneo. Os nenos aprenderán conceptos sobre urbanismo e cidade a través da comparativa con outras urbes, a utilización de medios audiovisuais e novas tecnoloxías e a interacción entre eles a través de videoconferencias.
O resto de sesións terán un carácter transversal nas que a arquitectura misturarase con outras disciplinas artísticas como a pintura ou a escultura. Utilizando os bloques constructivos do Sistema Lupo faranse grandes murais de autores como Luis Seoane ou Isaac Diaz Pardo, coñeceremos as creacións do Laboratorio de Formas ou a relación entre a arquitectura e a escultura de gran formato. Como colofón formularase un obradoiro familiar para a construción en conxunto de pais e nenos. A arquitectura, a arte, a creatividade en xeral serán os protagonistas da didáctica.
Na Fundación Luís Seoane. Datas: 5, 12, 19, 26 de maio; 2, 9, 16 e 23 de xuño O custe da matrícula é de 25 euros, aplicándose un desconto do 20% para grupos de irmáns. Folla de inscrición: Nenoarquitectura (.pdf)
