Investigaron a influencia das radiacións que emiten os dispositivos móbiles.
Queila Bouza e Martín Álvarez, alumnos das Aulas Tecnópole e de 4º da ESO no IES O Couto de Ourense, resultaron gañadores do certame ”É de libro” coa súa investigación científica sobre a influencia das radiacións que emiten os dispositivos móbiles, como os teléfonos ou os routers wifi, na xerminación das sementes e no crecemento das plantas.
Concluíron que hai unha influencia directa polo menos no proceso de xerminación, ao comprobar que a fertilidade das sementes foi maior no caso das que non estiveron expostas á radiación.
O proxecto foi desenvolvido no marco das Aulas Tecnópole, o programa de capacitación en habilidades científicas e innovadoras organizado polo Parque Tecnolóxico de Galicia e financiado pola Consellería de Economía e Industria. No certame, organizado polo Centro Español de Dereitos Reprográficos (CEDRO) co apoio do Ministerio de Educación, participaron un total de 3441 estudantes de toda España, que presentaron 517 proxectos.