A natureza máis próxima e máis descoñecida. Exposición fotográfica no Aquarium Finisterrae
Esta exposición é unha pequena homenaxe que o fotógrafo, Miguel López Caeiro, fai a esa natureza tan próxima que todos recoñecemos e que algúns se sorprenderán de ver como unha vez retratada adquire un valor estético insospeitado.
As 60 fotografías que contén a exposición ofrecen belas perspectivas de lugares como o encoro de Cecebre, con imaxes dun amencer nesta paraxe ou corvos mariños pousados nas ramas que emerxen das súas augas; unha charca mareal na praia de Baldaio durante a posta de sol, co cabo San Adrián e a illa Sisarga Grande ao fondo; un pequeno afluente do río Eume abríndose paso entre a espesa vexetación das Fragas do Eume; ou unha bubela criando aos seus pitos no niño instalado no buraco do muro dunha casa en Vilaboa.
López Caeiro retrata así paisaxes, fauna e vexetación de lugares moi próximos cuxa beleza resulta tan impactante como a de calquera outro sitio do mundo
Na sala Isabel Castelo do Aquarium Finisterrae.