A polinización é o proceso a través do cal as plantas son fecundadas obtendo sementes e froitos e xa que logo alimentos. A seguridade alimentaria e a biodiversidade dependen, en gran medida da polinización, un servizo ecolóxico gratuíto e fundamental para o planeta.
Sabías que…
… a nivel estatal existe a maior cabana apícola e a principal produción de mel e polen en Europa
…só en Europa o 84% dos cultivos e o 80% das flores silvestres dependen da polinización animal, en particular dos insectos
…só para a agricultura europea estímase que a polinización supón uns 22 mil millóns de euros anuais e a nivel mundial duns 265 mil millóns de euros anuais
No mundo existen polo menos 20.000 especies de abellas silvestres e en Europa perto de 2.500, pero sen dúbida, as grandes protagonistas son as abejas melíferas (Apis mellifera) por ser as máis eficientes e as máis abundantes.
Mais dende hai anos as poboacións de abells “domésticas” e doutros insectos polinizadores están sufrindo un descenso. Nos últimos invernos, a mortandade das colonias de abellas melíferas en Europa foi, como media, do 20% chegando a 53% nalgúns países.
E diante disto… que podes facer ti? Velaí catro ideas propostas polo colectivo ecoloxista Greenpeace:
1. Apoia as iniciativas para facer presión sobre os responsables políticos de forma que se prohiban os praguicidas tóxicos para as abellas e para promover un modelo de agricultura máis sustentable e ecolóxico
2. Aumenta o consumo de produtos da colmea (mel, polen, propoleo, xelea real e cera). Son sans e con iso apoias os apicultores e polo tanto as abellas. A apicultura é unha das actividades humanas máis sostible
3. Consume produtos ecolóxicos, así fomentas un modelo de agricultura que favorece, entre moitas cousas, ás abellas e outros polinizadores
4. No teu horto, xardín, terraza… potencia os refuxios naturais para polinizadores, ou fai ti mesmo algún, e planta variedades locais e atractivas para as abellas e outros polinizadores
Máis información na web de Greenpeace: informe ‘O declive das abellas’ (.pdf)
