En especial, a autoestima é un factor que “ten unha importancia moi clara”.
Un estudo da Universidade Carlos III de Madrid analiza os procesos que inflúen na formación das aspiracións ocupacionais dos nenos e nenas preadolescentes, con especial atención sobre os factores que inciden na elección de ocupacións típicas de cada xénero. Segundo a investigación, na elección interveñen, entre outros factores, os estudos dos pais ou a propia autoestima.
Os nenos que aspiran a profesións consideradas típicas do seu sexo teñen o dobre de posibilidades de terminar desempeñando algunha delas na idade adulta. Con todo, só “un 6% acaba nas ocupacións ás que aspiraban sendo cativos”, comenta o investigador Javier Polavieja, profesor de Socioloxía do departamento de Ciencias Sociais da UC3M.
Para extraer estas conclusións o estudo analiza dous factores decisivos: por unha banda, aqueles que teñen que ver coas características da contorna familiar dos nenos, as ocupacións dos pais e nais e a distribución de roles de sexo dentro do fogar; e por outra banda, a psicoloxía deses nenos, en particular o seu grado de motivación na escola e a súa autoestima.
O comportamento dos pais ante as tarefas do fogar inflúe en como aprenden os nenos os roles que resultan máis apropiados para cada sexo. Nas familias cun reparto moi tradicional das tarefas domésticas, os nenos aspiran a profesións consideradas ‘masculinas’.
Con todo, esta conclusión non é aplicable ao sexo feminino, xa que as nenas procedentes de familias igualmente tradicionais na distribución de roles non eran máis proclives a desexar traballos típicos do seu sexo, segundo as observacións dos investigadores.
Recursos socioeconómicos dos pais
Outra evidencia que atoparon é que os recursos socioeconómicos dos pais e nais afectan á ambición profesional dos nenos. Os científicos observan que as fillas que teñen pais e/ou nais con estudos universitarios tenden a aspirar á cúspide da xerarquía ocupacional: directivas, manager… que son ocupacións “onde existen menos mulleres e, xa que logo, son menos típicas do seu sexo”, explica o profesor Javier Polavieja, que publicou o estudo na revista Social Forces xunto con Lucinda Platt, profesora de Política Social e Socioloxía na London School of Economics.
En canto aos fillos de pais e nais universitarios, a investigación conclúe que teñen ocupacións menos habituais que aquelas desempeñadas por outros membros do seu sexo e iso, segundo Polavieja, explícase porque “probablemente a educación dos pais conleva un tipo de valores máis igualitarios que os nenos aprenden na casa”.
En relación aos atributos psicolóxicos observables, a investigación céntrase particularmente na motivación e a autoestima. En especial, a autoestima é un factor que “ten unha importancia moi clara, sobre todo no caso dos nenos”, comenta o sociólogo. Segundo o seu traballo, os nenos que teñen un nivel de autoestima máis alto son os que aspiran a ocupacións menos típicas do seu sexo e “teñen maior capacidade de ir en contra das normas de xénero”, conclúe.
Para desenvolver este estudo, os investigadores analizaron as aspiracións profesionais de nenos de ambos sexos con idades comprendidas entre 11 e 15 anos. Os datos que utilizaron, obtidos do British Household Panel Survey, corresponden a unha mostra de 1693 nenos e 1667 nenas, que foron enquisados repetidamente desde a infancia ata os seus primeiros traballos significativos como adultos.
Referencia bibliográfica:
Javier G Polavieja e Lucinda Platt. “Nurse or Mechanic? The Role of Parental Socialization and Children’s Personality in the Formation of Sex-Typed Occupational Aspirations”. Social Forces.
Fonte: UC3M / Axencia SINC
