O informe da OMS indica que anualmente aínda se producen 5,9 millóns de mortes de menores de cinco anos.
A mortalidade infantil no mundo caeu a menos da metade do que era en 1990, segundo un novo informe publicado hoxe pola Organización Mundial da Saúde (OMS). De feito, as mortes de nenos menores de cinco anos diminuíron desde as 12,7 millóns en 1990 a 5,9 millóns en 2015. Este é o primeiro ano no que a cifra caeu por baixo dos 6 millóns.
As novas estimacións do Informe sobre Niveis e Tendencias da Mortalidade Infantil 2015 ,realizado polo Fondo para a Infancia das Nacións Unidas (UNICEF), a OMS, o Grupo do Banco Mundial, e o departamento de Asuntos Sociais e Económicos de Nacións Unidas (UNDESA), mostran que, aínda que o progreso foi substancial, 16.000 nenos menores de cinco anos seguen morrendo cada día.
Ademais, o texto sostén que a caída do 53% na mortalidade de menores de cinco anos alcanzada non é suficiente para cumprir co Obxectivo de Desenvolvemento do Milenio (ODM) “oito propósitos de desenvolvemento humano fixados no 2000 que os 189 países membros das Nacións Unidas acordaron conseguir para este ano” de reducir ditas taxas en dous terzos entre 1990 e 2015.
“Temos que recoñecer un enorme progreso global, especialmente desde 2000, momento no que moitos países triplicaron a taxa de redución da mortalidade de menores de cinco anos”, explicou Geeta Rao Gupta, directora executiva de UNICEF”.
O informe sinala que o maior reto segue sendo no período ao redor do nacemento. O 45% das mortes de menores de cinco anos ocorren no período neonatal “durante os primeiros 28 días de vida”, e as principais causas son prematuridade, pneumonía, complicacións durante o parto, diarrea, sepse e malaria. Ademais, case a metade destas mortes están asociadas coa desnutrición.
No entanto, segundo os expertos a maioría das mortes infantís son facilmente previbles mediante intervencións relativamente sinxelas e dispoñibles. É máis, a taxa de redución poderíase acelerar considerablemente ao concentrarse nas rexións cos niveis máis altos, África subsahariana e Asia meridional, e asegurar un enfoque orientado aos recentemente nados.
“Sabemos como previr a mortalidade neonatal innecesaria. Cunha atención de calidade no momento do parto, asegurando o contacto cedo pel a pel, a lactancia materna exclusiva e un coidado especial para os bebés pequenos e enfermos, pódense salvar miles de vidas cada ano”, sinalou Flavia Bustreo, subdirector xeral da OMS.
Así, continuou Bustreo, “a Estratexia Mundial da Muller, a Infancia e a Saúde dos Adolescentes, que se presentará na Asemblea Xeral da ONU este mes, será un importante catalizador para dar a todos os recentemente nacidos a oportunidade dun comezo saudable na vida”.
Non é igual nacer en Europa ou en África
O informe destaca que a posibilidade de supervivencia dun neno é moi diferente segundo o lugar onde naza. África subsahariana ten a maior taxa de mortes en menores de cinco anos no mundo cunha por cada 12 nacementos “máis de 12 veces superior á media dunha morte por cada 147 nacementos nos países de altos ingresos”.
Entre 2000 e 2015, a rexión acelerou a súa taxa anual de redución da mortalidade de menores de cinco anos a perto de dúas veces e media o que foi entre 1990 e 2000. De feito, malia os baixos ingresos Eritrea, Etiopía, Liberia, Madagascar, Malawi, Mozambique, Níxer, Ruanda, Uganda ou Tanzania cumpriron coa meta dos ODM.
Puntos chave do informe
Aproximadamente un terzo dos países do mundo (62 en total) cumpriron a meta do ODM de reducir a mortalidade de menores de cinco anos en dous terzos, mentres que outro 74 reduciron as taxas polo menos a metade.
O mundo no seu conxunto acelerou o progreso na redución da mortalidade de menores de cinco; a súa taxa anual de redución aumentou de 1,8% entre 1990-2000 ao 3,9% entre 2000-2015.
Dez dos 12 países de baixos ingresos que reduciron estas taxas de mortalidade polo menos dous terzos atópanse en África.
O 45% das mortes de menores de cinco anos ocorre durante os primeiros 28 días de vida. Un millón de mortes neonatais ocorren no día do nacemento, e perto de 2 millóns de nenos morren na primeira semana de vida.
Fonte: Axencia SINC
