Inicio » Saúde » O 70% dos menores non come froita fresca e só un 3% máis dunha verdura ao día

O 70% dos menores non come froita fresca e só un 3% máis dunha verdura ao día

O 70% dos menores non come froita fresca e só un 3% máis dunha verdura ao díaAs froitas, verduras e hortalizas son imprescindibles na nosa dieta achegando auga, fibra, vitaminas e sales minerais. Por esta razón, a XVI edición do Día Nacional da Nutrición, que se celebra cada ano o 28 de maio, quixo centrarse na importancia dunha boa alimentación combinada cuns hábitos de vida saudables. En liña co tema “Este ano levámosche á horta” , a FESNAD (Federación Española de Sociedades de Nutrición, Alimentación e Dietética) e a AECOSAN (Axencia Española de Consumo, Seguridade Alimentaria e Nutrición), presentaron a semana pasada as actividades que levarán a cabo durante a campaña deste ano coa que buscan concienciar a toda a poboación da importancia que ten levar un estilo de vida saudable.

Na presentación de campaña participaron Teresa Robledo, Directora Executiva da Axencia Española de Consumo, Seguridade Alimentaria e Nutrición; a doutora Ascensión Marcos, Presidenta da FESNAD; e a doutora Irene Bretón, Vicepresidenta da FESNAD, que lembraron que o consumo diario recomendado de froitas, verduras e hortalizas é de 5 racións, o que é básico para o mantemento dunha correcta alimentación, non só pola súa riqueza nutricional senón porque ademais, proporciona unha gran diversidade de alimentos e as súas propiedades organolépticas e estruturais confírenlle presentacións que poden facer o seu consumo máis apetecible.

Durante a presentación lembrouse que o déficit destes alimentos na nosa dieta pode carrexar no noso organismo grandes carencias de nutrientes como vitaminas, fibra ou sales minerais, entre outros. Ademais, trátase dunha fonte indiscutible de auga que, como destacaron os representantes de FESNAD, é un elemento esencial para manternos correctamente hidratados.

A doutora Ascensión Marcos, presidenta de FESNAD, quixo destacar durante a súa intervención que “o noso país ofrécenos unha infinidade de variedades de froitas, verduras e hortalizas. Ademais, practicamente todas as Comunidades Autónomas, ofrecen produtos típicos da súa horta, o que fai que a variedade se multiplique”. A forma de elaboración tamén ocupou un apartado de interese durante a presentación, segundo a doutora Marcos, “As técnicas culinarias nos procesos de cociñado tamén xogan un papel importante no mantemento dos nutrientes, desta maneira, recoméndase consumilas ao vapor, pero o mellor é experimentar e comprobar que estes alimentos non teñen que ser, para nada, aburridos ou monótonos”.

Tanto desde a FESNAD como desde a AECOSAN indicouse que “consumir 2-3 racións de froita ao día e outras 2-3 racións de verduras e/ou hortalizas, incorporadas no almorzo, xantar, merenda, como acompañamento e/ou como sobremesas nas comidas principais (comida e cea), axudan o noso organismo para previr moitas enfermidades entre as que destacan as enfermidades cardiovasculares, o cancro, enfermidades do sistema dixestivo e algunhas enfermidades neurodexenerativas grazas ao seu alto contido en vitaminas, fibra, antioxidantes e minerais”.

Pola súa banda, Teresa Robledo, Directora Executiva da Axencia Española de Consumo, Seguridade Alimentaria e Nutrición puxo de manifesto o labor que está a levar a cabo a AECOSAN a través da Estratexia NAOS e lembrou que “a creación de hábitos saudables como é o consumo de 5 racións de froitas e hortalizas ao día desde a infancia é primordial para previr a obesidade infantil e desenvolver enfermidades non transmisibles nas distintas etapas da vid”?. Ademais, indicou que “segundo os datos da Enquisa Nacional de Alimentación en Poboación Infantil e Adolescente, ENALIA da AECOSAN, só o 30% de nenos e nenas entre 6 meses e 17 anos consome froita fresca ou zumes naturais máis dunha vez ao día, e tan só o 3% consome hortalizas máis dunha vez ao día”, e que “a familia é a contorna ideal, xunto co colexio, para promocionar e fomentar o consumo de froitas e hortalizas en nenos e nenas”.

Deixa unha resposta

O teu enderezo electrónico non se publicará Os campos obrigatorios están marcados con *


*