Entre o feixe de espectáculos da festa luguesa haberá espazo para moitas actividades pensadas para os cativos.
Son máis de 150 actividades de música, teatro e espectáculos diversos os que acolle Lugo deica o próximo 12 de outubro na festa do San Froilán.
E ademais, desta volta, achégannos programa específico baixo o lema San Froilán Miúdo, un conxunto de actividades deseñadas para rapazas e rapaces que promove a delegación de Cultura da Deputación de Lugo. Deste xeito, entre o 5 e o 12 de outubro, estarán na cidade a Compañía Malabaranda, os zancudos e percusionistas de Gostoso Pa, Teatro do Miolo, Peter Punk ou Palimoco Teatro. As actividades desenvolveranse na zona dos xardíns da Deputación.
