Unha neveira que funciona con placas solares deseñada por alumnos de Carballo, papel fabricado a partir de algas mariñas por estudantes de Vigo, rampas con fluído newtoniano deseñadas para aumentar a vida útil dos amortecedores dos coches ou controladores 3D para videoconsolas máis económicos ca os que traen a Playstation e a Xbox, estes dous últimos por alumnos composteláns.
Son exemplo de enxeños que os estudantes de Secundaria e FP participantes na ‘Galiciencia’ mostraron ao público desde os seus stands na Tecnópole-Parque Tecnolóxico de Galicia, en Ourense, na maior feira científica de Galicia.
O evento foi este ano actividade de referencia da Semana da Ciencia 2011 en España por medio da Fundación Española para la Ciencia y la Tecnología (FECYT), que actuou como patrocinadora xunto coa Consellería de Economía e Industria.
En total, expuxéronse 16 proxectos procedentes de colexios da provincia de Ourense, 15 de Pontevedra, 10 da Coruña, 3 de Lugo, 5 de Catalunya e 2 de Euskadi. Entre eles figuran varios realizados polos equipos participantes nas Aulas Tecnópole, un proxecto piloto de adestramento en habilidades innovadoras promovido polo Parque Tecnolóxico de Galicia.