Un total de 44 traballos optaron nesta edición ao III Concurso de Fotografía polos Dereitos Humanos que organiza o Consorcio As Mariñas. A temática proposta abranguía os dereitos da infancia, igualdade e equidade de xénero; medio ambiente; adolescencia e mocidade; liberdade de expresión, entre outros. O certame estivo dirixido a xoves de entre 12-18 anos residentes en Abegondo, Arteixo, Bergondo, Betanzos, Cambre, Carral, Culleredo, Oleiros e Sada.
O xurado, integrado por Santiago Casal Quintáns, fotógrafo, Víctor Omgba, presidente da Asociación Equus Zebra e Juan A. Pulido Álvarez, coordinador de Médicos do Mundo Galicia destacou no fallo a profundidade no enfoque, a calidade e o tratamento dos temas achegados salientando a sensibilidade coa que os participantes, tendo en conta as idades, soubo reflectir nas súas obras. 
Entre as imaxes recibidas, seleccionáronse tres fotografías. O primeiro premio foi para Javier Tasende Sanmartín, alumno de 2º da ESO do IES de Viós de Abegondo pola fotografía ‘Rodas 1’. O segundo premio recaeu en Daniel Muiños Noguerol, alumno de 2º da ESO no CPI Cruz do Sar de Bergondo pola fotografía ‘Aprendendo a nadar’. O terceiro premio foi para Silvia Acuña Ruano, alumna de 1º de Bacharelato do IES María Casares de Oleiros, pola fotografía ‘Nin o intentedes’.
A entrega de premios tivo lugar no Edificio Administrativo ‘Toñito Espiñeira’ de Carral e estivo presidido por Margarita Ramilo e Laura Calvo, concelleiras de Servizos Sociais de Carral e Abegondo respectivamente.
