InvestigArte: O concurso dos científicos do hoxe e do mañá

Na procura das mellores imaxes científicas realizadas por investigadores e estudantes de Secundaria, Bacharelato ou Formación Profesional.

Grupos de investigación, así como alumnado de ESO, Bacharelato e Formación Profesional son os destinatarios de InvestigArte, un concurso no que se busca que os e as participantes mostren de xeito visual aspectos científicos e tecnolóxicos. Esta é unha iniciativa que, a través da imaxe, busca explicar ás novas xeracións e á sociedade en xeral o alcance das innovacións científicas e tecnolóxicas asociadas a proxectos de investigación.
 
InvestigArte está impulsado polo Campus de Excelencia Internacional da USC, Campus Vida; educaBarrié (a canle de comunicación coa comunidade educativa da Fundación Barrié); e o Instituto de Investigacións Sanitarias de Santiago (IDIS). As persoas interesadas poden participar nalgunha das dúas modalidades contempladas, como son Grupos de Investigación, por unha banda, e alumnado de ESO, Bacharelato e FP, por outro.
 
No primeiro caso, os/as investigadores/as poderán presentar as súas propostas nas categorías de ‘Macrofotografía’ (para imaxes de obxectos maiores a un milímetro) e ‘Microfotografía’ (para obxectos menores ou iguais a un milímetro). Na segunda das modalidades, as obras presentadas poderán facelo en formato fotografía, vídeo ou ilustración, sen importar os materiais empregados senón o punto de vista ofrecido. A presentación de propostas pode realizarse ata o día 1 de marzo de 2013. As persoas interesadas poden consultar os detalles das bases do concurso na web deste concurso.
 
Esta convocatoria é unha iniciativa que organiza un grupo de investigadores novos que, a través dun concurso científico-visual, buscan dar a coñecer a investigación que se está realizando na actualidade e como esta repercutirá no benestar da poboación. “A ciencia é un alicerce importante para a mellora da calidade de vida das persoas así como para fortalecer a economía dos países”, sinalan os seus promotores. Neste senso, InvestigArte tenta desenvolver novas canles de comunicación na difusión da ciencia, “en tanto que realidade pouco coñecida para o gran público” propiciando o achegamento dos grupos de investigación e os seus resultados á sociedade.
 Como apuntan os seus promotores, o concurso traza un vía para facer chegar á cidadanía dun xeito claro e mesmo palpable a significación e o alcance do traballo realizado en laboratorios e centros de investigación, resaltando a relación directa existente entre progreso e ciencia. InvestigArte arrincou o sábado 1 de decembro a través da súa web onde se poden enviar, consultar ou votar as obras participantes. Tras o ditame dun xurado de expertos en arte e ciencia, realizarase unha exposición das mellores obras artístico-científicas recibidas, tanto de investigadores como de centros educativos, que iniciará un percorrido itinerante por diversas cidades de Galicia.

COMPARTIR

1 COMENTARIO

Deixa una resposta a ‘Investigarte’ amplía prazo deica o 10 de marzo | Botóns Cancelar resposta

Por favor, introduce o teu comentario!
Por favor, introduza o seu nome aquí

*