Convite ás familias visitantes da exposición a metérense na pel duns arqueólogos.
Do 4 ao 31 de marzo, as familias que acudan á viaxe Historia de Galicia a través da pedra na exposición Gallaecia Petrea que ten lugar na Cidade da Cultura, poderán optar a premio.
Propoñeranse seis grandes misterios e desvelar correctamente os enigmas terá recompensa, posto que ademais de divertirse en familia e de coñecer un pouco máis a nosa historia, os participantes poderán gañar paquetes de fin de semana para dous adultos e dous nenos nun establecemento de turismo rural adscrito ás asociacións Agarimo e Pazos de Galicia, colaboradores do concurso xunto con Turismo de Galicia.
Para participar hai que recoller no mostrador de entrada do Museo Centro Gaiás a ficha que contén os seis misterios; resolvelos en equipo contestando correctamente os maiores ás preguntas e realizando as actividades didácticas os máis pequenos; cubrir os datos de contacto ao finalizar o percorrido e depositar a ficha completa no mostrador de entrada.
