Prepárase este evento coa participación dun coro de alumnado de entre 8 e 12 anos.
O concerto formará parte da celebración do 150º aniversario de ‘Cantares Gallegos’, e vaise realizar o vindeiro 7 de xuño na Praza da Quintana, en Santiago de Compostela.
Alumnado de entre 8 e 12 anos dos conservatorios e escolas de música de toda Galicia ensaiará previamente este evento, promovido pla Consellería de Educación e o Consello da Cultura, na Cidade da Cultura. Maximino Zumalave, coordinador da Sección de Música e Artes Escénicas do Consello da Cultura será o encargado de dirixir a actividade.
As cativas e cativos prepararán pezas clásicas en lembranza de Rosalía de Castro para este concerto no que se interpretarán Maio longo (Follas Novas), de José Baldomir; Rosa de abril (Cantares Gallegos), de Andrés Gaos; En Cornes (Follas Novas), de Octavio Vázquez; e Negra Sombra (Follas Novas), de Juan Montes. Os nenos cantores estarán acompañados polo grupo de metais Hércules Brass, composto por 2 cornos, 2 trompetas, trombón e tuba.
O prazo de inscrición para os centros que desexen participar estará aberto ata o 15 de abril. A selección será por orde de inscrición.
