Concurso de debuxo infantil sobre o ballet ‘A bela adormecida’

ballet-bela-adormecidaPara cativos/as de 7 a 13 anos. Prazo aberto deica o 17 de xaneiro.

A obra gañadora empregarase como cartel promocional da montaxe coreográfica que se estreará na Coruña o 21 de febreiro en colaboración coa Sinfónica de Galicia e con conservatorios e escolas de danza. O certame está aberto a nenas e nenos de 7 a 13 anos, e busca espertar a súa creatividade e curiosidade arredor do mundo da danza facéndoos partícipes do proceso creativo deste espectáculo.

Para a súa realización pódese empregar calquera tipo de técnica (lapis de cores, rotulador, cera, témpera, etc.), sempre que se adapte ao formato de folio DIN A-4. O tema é a historia de ‘A bela adormecida’, escrita polo francés Charles Perrault a partir dun conto de tradición oral e que a finais do século XIX serviu de inspiración para un dos ballets máis aclamados do repertorio clásico universal, con música de Tchaikovski, coreografía de Petipa e libreto de Vsevolojski.

A obra gañadora será elixida por un xurado presidido pola directora do Centro Coreográfico Galego, Mercedes Suárez, e do que tamén formarán parte un representante do Museo de Arte Contemporánea Gas Natural Fenosa e dous profesionais da fotografía e do deseño. Este debuxo será empregado como cartel promocional do novo espectáculo da unidade de produción coreográfica da Consellería de Cultura e Educación. Nel figurará tamén o nome do gañador/a, quen recibirá á súa vez catro entradas para a estrea da Coruña.

O xurado seleccionará, así mesmo, un total de 50 debuxos para ser expostos no Pazo da Ópera da Coruña durante os días de representación do ballet, que o Centro Coreográfico Galego escenificará do 21 ao 23 de febreiro xunto coa Orquestra Sinfónica de Galicia e coa participación de diferentes conservatorios e escolas galegas de danza, seguindo a fórmula de colaboración didáctica empregada para o ‘Quebranoces’, a súa anterior produción.

As bases completas na web do Centro Coreográfico Galego

Deixar un comentario

Por favor, introduce o teu comentario!
Por favor, introduza o seu nome aquí

*