Escoitar música fainos sentir ben. Iso non é novo. Agora, un estudo dá un paso máis aló e revela os efectos no cerebro das nosas melodías preferidas. Os resultados publícanse en Scientific Reports, unha das revistas da editorial Nature. Os primeiros acordes da nosa canción favorita desencadean un patrón común de actividade cerebral “xéranse pensamentos e recordos” independentemente da persoa que goce da melodía. Con todo, ata agora non se coñecía como se produce esta activación no cerebro.
Os achados, publicados en Scientific Reports, unha das revistas da editorial Nature, poderían explicar por que diferentes persoas describen sentimentos e recordos similares ao escoitar a súa peza musical favorita, tanto se é unha composición de Beethoven ou Eminem.
Para entender por que a xente ten experiencias comparables, o grupo de investigación estadounidense avaliou as diferenzas nas redes funcionais do cerebro (utilizando imaxes de resonancia magnética funcional, fMRI) en 21 persoas que escoitaron diferentes tipos de música, incluíndo rock, rap, e melodías clásicas. Os científicos identificaron modelos consistentes da conectividade cerebral asociada ás cancións favoritas e demostraron que un circuíto importante nos pensamentos introspectivos – a rede neuronal por defecto (Default Mode Network ou DMN, en inglés) – conéctase máis cando se escoita a música preferida.
Como explica a SINC Jonathan Burdette, profesor do Centro Médico Wake Forest Baptist (EE UU) e un dos principais autores do estudo, “aínda que non entendemos completamente o que fai a DMN, é probable que teña un papel importante na determinación de quen somos e como encaixamos no mundo”. Os expertos refírense a isto como pensamentos autoreferenciais. Segundo os autores, os resultados foron inesperados “dado que as preferencias musicais son fenómenos individualizados e que a música pode variar moito en complexidade rítmica, presenza ou ausencia da letra, consistencia, etc.”.
Cancións favoritas, vellas emocións
O traballo pon de manifesto que a escoita dunha canción favorita altera a conectividade entre as áreas cerebrais auditivas e o hipocampo, unha rexión responsable da memoria e a consolidación das emocións.
Os expertos comprobaron así que ao escoitar as melodías favoritas prodúcese unha desconexión das áreas de procesamento de son do cerebro nas zonas de codificación da memoria do devandito órgano. “Isto débese probablemente a que ao escoitar a nosa música favorita, non estamos creando novos recordos. Máis ben, estamos aproveitando recordos e vellas emocións”, subliña Burdette.
Para os autores, estes achados poderían ter importantes implicacións na terapia musical, sobre todo na elección apropiada da música capaz de involucrar aos circuítos cerebrais danados.
Referencia bibliográfica:
R. W. Wilkins, D. A. Hodges, P. J. Laurienti, M. Steen & J. H. Burdette. Network Science and the Effects of Music Preference on Functional Brain Connectivity: From Beethoven to Eminem. SCIENTIFIC REPORTS | 4 : 6130 | DOI: 10.1038/srep06130. DOI: 10.1038/srep06130 http://dx.doi.org/10.1038/srep06130
Fonte: Axencia SINC
