Prometedores resultados no tratamento da alerxia infantil ao trigo

trigo_bebeNo estudo levado a cabo por investigadores do Centro de Biotecnología y Genómica de Plantas (CBGP) – constituído pola Universidad Politécnica de Madrid (UPM) e o Instituto Nacional de Investigación y Tecnología Agraria y Alimentaria (INIA) – en colaboración co Servicio de Alergia do Hospital Infantil Universitario Niño Jesús de Madrid, comprobouse que a maioría dos nenos sometidos ao novo tratamento de inmunoterapia oral conseguiu ao final do proceso comer 100 gramos de pan de trigo sen presentar efectos adversos, superando así o perigo da inxesta accidental ao que sempre están expostos os pacientes con esta alerxia. Isto podería ser a base para o desenvolvemento de ensaios clínicos con maior número de pacientes para avaliar o beneficio terapéutico deste novo enfoque no tratamento deste tipo de alerxia.

O trigo é un dos alimentos que máis frecuentemente produce alerxia nos nenos (ao redor dun 35% á idade de 12 anos). O tratamento máis común para este tipo de enfermidade é evitar o consumo de trigo, pero isto pode conlevar un desequilibrio nutricional debido á idade dos menores. Ademais, tratar de non comer trigo é difícil, dado que está presente en moitos produtos alimenticios e, ás veces, malia a que na etiqueta poida advertir da presenza de trigo, prodúcense accidentes que poden chegar a ser moi graves. Isto obriga aos pais a estar sempre alerta e a prohibir aos seus fillos alérxicos o consumo de calquera alimento non vixiado, o cal supón un gran estrés social. Por todo iso, é moi importante tratar de atopar novas formas de tratamento que induzan a tolerancia a este alimento.

Neste contexto xurdiu a colaboración entre os investigadores do CBGP (UPM-INIA) e o Servicio de Alergia do Hospital Infantil Universitario Niño Jesús de Madrid co obxectivo de atopar novas formas de tratamento para este tipo de alerxia.

O novo tratamento realizouse con seis nenos con alerxia a trigo. Estes pacientes sometéronse a inmunoterapia oral, que consiste na administración prolongada de doses crecentes de trigo. Cinco dos menores estudados finalizaron con éxito o tratamento en 24 días, e 6 meses despois todos os pacientes mantiveron boa tolerancia a 100 gramos de trigo diario. Desta forma, a maioría destes nenos sometidos a inmunoterapia oral conseguiron comer 100 gramos de pan de trigo ao final do proceso, e xa que logo, poderían consumir trigo e produtos derivados, superando o perigo da inxesta accidental.

Os resultados deste estudo poderían ser a base para ensaios clínicos con maior número de pacientes e avaliar o beneficio terapéutico deste novo enfoque.
Bibliografía:
RODRÍGUEZ DEL RIO, P.; DÍAZ-PERALES, A.; SÁNCHEZ-GARCÍA, S.; ESCUDERO, C.; DO SANTOS, PATRICIA; CATARINO, M.; IBAÑEZ, M. D. “Oral Immunotherapy in Children With IgE-Mediated Wheat Allergy: Outcome and Molecular Changes”. Journal of Investigational Allergology and Clinical Immunology, 24 (4):240-248; 2014.

Fonte: UPM

COMPARTIR

Deixar un comentario

Por favor, introduce o teu comentario!
Por favor, introduza o seu nome aquí

*