Malia que a maior parte da radiación nociva que provén do sol é absorbida pola atmosfera, á superficie terrestre chegan raios ultravioleta suficientes como para causar queimaduras de pel e complicacións oculares en estruturas como a retina e a córnea.
Neste sentido, un estudo publicado recentemente na revista científica JAMA Ophthalmology puxo de manifesto que cada hora que se dedica a estar exposto ao sol no verán incrementa nun 4% a posibilidade de desenvolver alteracións na estrutura do cristalino.
Así, desde o departamento de Óptica, Farmacoloxía e Anatomía da Universidad de Alicante (UA) insisten en como o uso de lentes de sol homologadas desde as 10:00 ás 16:00 horas pode reducir dita probabilidade ao redor dun 2%. Pero, que hai que ter en conta para a elección dunha lente de sol?
Unha das condicións imprescindibles é que a lente estea marcada co selo da Comunidade Europea (CE), posto que iso indica que respecta a normativa. Ademais, “non se debe esquecer que a lente de sol é un elemento importante para a saúde visual e, xa que logo, a súa adquisición debe estar supervisada por un óptico-optometrista”, sinala o profesor da UA, David Piñero.
Grado de filtración
Outro aspecto importante é coñecer o grao de filtración necesario para a contorna e a actividade en que a utilizamos. De acordo coa normativa europea sobre lentes de sol, os filtros de protección solar clasifícanse en cinco categorías, do 0 ao 4.
No caso da condución é correcto o uso dunha protección de categoría 1, 2 ou 3 non usando xamais a 4 xa que podería dificultar a percepción dos sinais de tráfico. Segundo Piñeiro, por exemplo “no verán en Alicante cunha protección de categoría 2 ou 3 é máis que suficiente, pero no caso de que practiquemos deportes de auga ou en alta montaña, onde existe unha reflexión da luz solar considerable, sería adecuado utilizar unha protección 4”.
Hai que poñer especial atención e coidado nos máis pequenos e as persoas maiores. Os nenos e nenas sobre todo son sensibles á radiación ultravioleta, posto que o cristalino resulta moi transparente ata a adolescencia. É recomendable o uso de filtros das categorías 2, e especialmente 3, e de lentes e varillas moi resistentes. No caso das persoas maiores recoméndase a mesma categoría que para os nenos.
Falsos mitos
Igual que o prezo non é un parámetro de calidade, a cor da lente tampouco é un indicativo da protección que ofrece. “Existen lentes excesivamente escuras que non filtran correctamente a luz ultravioleta, favorecendo unha maior dilatación pupilar e un incremento da radiación que recibe o ollo”, aclara Piñero.
A radiación ultravioleta é un factor de risco para os nosos ollos e, segundo apunta o profesor da UA, “produce un efecto acumulativo que podería desencadear nalgún caso problemas nos fotorreceptores, mala visión de forma progresiva, dexeneracións maculares ou a aparición dun pterigión, tecido que invade a córnea, coñecido coloquialmente como a palmera”.
Fonte: Axencia SINC
