As caries e as enfermidades das enxivas seguen sendo os principais problemas bucodentais dos nenos e nenas de entre 6 e 12 anos.
Unha investigación liderada polas universidades de Salamanca e Granada avaliou a saúde bucodental de nenos españois entre 6 e 12 anos e confirma os bos datos rexistrados nos últimos lustros en comparación con épocas anteriores. No entanto, as caries e as enfermidades das enxivas seguen sendo os principais problemas, xunto con irregularidades na posición dos dentes que se poden corrixir mediante ortodoncia.
Javier Montero, investigador da Clínica Odontolóxica da Facultade de Medicina da Universidade de Salamanca e primeiro asinante do artigo, considera que a clave para alcanzar este “adecuado estado de saúde oral” está na popularización das medidas de hixiene dental e na concienciación acerca da importancia de seguir unha dieta máis sa para os dentes. Estes datos recóllense no International Journal of Paediatric Dentistry,
“A maioría das lambetadas xa veñen sen azucre e popularizáronse medidas preventivas por parte de colexios e pediatras”, comenta Montero. Incluso algunhas clínicas dentais realizan talleres para nenos que tratan de inculcarlles bos hábitos no cepillado dos dentes ou evitar o medo a acudir ao dentista.
Así mesmo, os expertos creen que foron fundamentais os programas de atención bucodental infantil que se encargan de coidados preventivos e reparadores. De feito, obsérvanse diferenzas entre as comunidades autónomas que os implantaron antes e as que o fixeron máis tarde.
Os sucesivos estudos demostran unha gran melloría da saúde oral infantil ata o ano 2000, mentres que a partir desa data hai unha mellora máis leve porque as estatísticas xa son moi boas. Por exemplo, a prevalencia de caries é baixa e, aínda que segue habendo casos, “concéntranse nun pequeno segmento da poboación infantil, mentres que a proporción de nenos libres dela é moi ampla”, explica Montero.
O rango de idade estudado, entre os 6 e os 12 anos, é fundamental porque neses anos saen os dentes novos. Nalgúns casos, un mal cepillado pode ocasionar problemas de enxivas. Por outra banda, os nenos que son respiradores orais, é dicir, os que toman o aire pola boca, expóñense a ter a boca máis seca e, polo tanto, a defenderse peor da placa bacteriana. Excepcionalmente, algúns problemas poden vir por traumatismos, aínda que adoitan ser leves. Pola contra, son frecuentes os defectos na posición dos dentes, algo que non se pode considerar propiamente como unha enfermidade, pero que é aconsellable corrixir con ortodoncia.
Necesidade de máis estudos
As análises epidemiolóxicos sobre estas cuestións seguen sendo escasos. Por iso, este estudo, no que participaron máis de 2.000 escolares, supón unha importante fonte de datos para os especialistas.
Os participantes foron sometidos a exploracións de dentes e enxivas e realizaron unha enquisa sobre o seu benestar relacionado coa saúde oral, posteriormente analizada cunha metodoloxía estandarizada. Un dos resultados obtidos subliña que os nenos perciben a dor e os problemas estéticos como os aspectos derivados da saúde bucodental que máis poden interferir na súa calidade de vida, por exemplo, en accións como comer e sorrir.
Referencia bibliográfica:
Montero J, Rosel E, Barrios R, López-Valverde A, Albaladejo A, Bravo M. Oral health-related quality of life in 6- to 12-year-old schoolchildren in Spain. International Journal of Paediatric Dentistry, 2015. doi: 10.1111/ipd.12193.
Fonte: Axencia SINC
