Dúas gymkhanas en rede para promover o bo uso de internet.
Aprender a xestionar a nosa privacidade sen facilitar datos persoais a descoñecidos, sen contribuír a difundir contidos vexatorios, coidar a linguaxe, aprender o valor da propiedade intelectual en internet ou reflexionar sobre os contidos que se comparten en redes sociais son algunhas das mensaxes que a Fundación de Axuda contra a Drogadicción (FAD) e Google pretenden transmitir con “Conectados” e “Conectados en familia”.
Trátase de dúas gymkhanas virtuais dirixidas aos adolescentes de 14 a 16 anos e ás súas familias, co fin de facerlles reflexionar sobre a importancia de usar responsablemente as novas tecnoloxías e de fomentar un uso construtivo de internet desde o respecto a un mesmo e aos demais.
Ambos os dous xogos falan da historia dun robot que, segundo avanza e supera probas, vai converténdose en humano. A idea creativa parte do convencemento de que o uso responsable das novas tecnoloxías supón ser capaces de controlar e xestionar a utilización que se fai delas.
Os participantes deberán demostrar que non son robots automatizados, senón que, coa súa intelixencia, sensibilidade e emocións, son capaces de sacarlle o mellor partido á tecnoloxía.
Todos os adolescentes e as familias que desexen participar deberán rexistrarse nas plataformas www.conectadoseljuego.com ou www.conectadosenfamilia.com, respectivamente. Os xogos permanecen abertos ata o 30 de outubro.
Nas dúas edicións anteriores participaron máis de 8.000 adolescentes de 14 a 16 anos e as súas familias.
