Co outono e a volta ás aulas, recomendámosvos os materiais desta iniciativa da Real Academia Galega en homenaxe a Carlos Casares.
Hai vidas de mulleres e de homes que laten ao compás do pulso do país, a de Carlos Casares é unha delas. Por iso, ademais da súa excelente produción literaria, na súa biografía atopamos a pegada fonda dun intelectual que decidiu comprometerse coa Galicia que lle tocou vivir.
Para afondar na súa vida e obra, a Real Academia Galega ofrece un conxunto de materiais de uso didáctico ao abeiro da iniciativa Primavera das Letras. O proxecto botou a andar este ano aló no mes de febreiro, nun emocionante acto celebrado no propio CEIP Carlos Casares do lugar de Vilariño, en Nigrán, a escola á que os propios fillos do autor acudiran de cativos, e coa participación no evento de Håkan, fillo de Carlos Casares e antigo alumno do centro.
Na web do proxecto podedes consultar todo o material sobre Carlos Casares. Ademais, está tamén dispoñible material didáctico diverso sobre Manuel María, homenaxeado en 2016, ano no que tivo lugar a primeira edición de Primavera das Letras.
Recomendámosvos tamén o apartado ‘O voso Día das Letras’, que fai peneira das boas prácticas e iniciativas en homenaxe a Casares que realizaron ducias de escolas de todo o país durante a pasada primavera.
MATERIAIS PARA DESCARGA
ACTIVIDADES PARA COLOREAR
ACTIVIDADES INTERACTIVAS
- O máxico mundo do Principiño
- Remexendo na obra de Casares
- O Parlamento: palabras para enterdérmonos
- Un polbo xigante e outros cefalópodos
- Paixón polos trens
- A Limia, patria pequena de Carlos Casares
- No Val Miñor
- Imos cazar palabras: Lolo anda en bicicleta
- O can Rin e o lobo Crispín
- Unha viaxe de Galicia a Escandinavia
ENCRUCILLADOS
