Rexeita o recurso de 17 colectivos que reclamaban facilitar xenéricos máis baratos.
A pasada semana a Oficina Europea de Patentes (EPO) valorou o recurso presentado en marzo de 2017 por organizacións de 17 países (Médicos do Mundo, Médicos Sen Fronteiras e a Fundación Salud por Derecho entre outras) contra a patente do sofosbuvir, un medicamento crucial para o tratamento e a cura da hepatite C.
A EPO decidiu manter esta patente clave sobre este compoñente, facilitando o monopolio da compañía Gilead Sciences e imposibilitando o desenvolvemento e a venda de versións xenéricas máis alcanzables en Europa.
O tratamento de 12 semanas de Sovaldi (nome comercial para o sofosbuvir) ten un prezo de ata 43.000 euros en Europa, segundo que país e segundo as negociacións de Gilead con estes. Este prezo, totalmente desorbitado, supuxo e supón unha barreira para os sistemas de saúde de case todos os países, que terminan racionando a compra de medicamentos e, en consecuencia, deixando a miles de persoas afectadas pola Hepatite C sen o tratamento para a súa enfermidade.
Desde a Fundación Salud por Derecho consideran que a decisión da EPO “é terriblemente decepcionante e volve poñer de manifesto o inxusto e amoral do sistema de patentes nos medicamentos. Esta decisión lexitima unha patente, inxustificada desde o punto de vista legal e científico, que permite a Gilead abusar da súa posición e impoñer prezos altísimos e inaccesibles a un medicamento que salva vidas e que necesitan miles e miles de persoas, non só en Europa, senón en todo o mundo”.
As organizacións apelaran a decisión da Oficina Europea de Patente: “É necesario acabar coas patentes abusivas sobre os medicamentos: patentes como a do ofosbuvir ou como as dos novos medicamentos para o cancro, que están a saír ao mercado con prezos que alcanzan os 400.000 euros por tratamento. Non hai sistema de saúde no mundo que poida afrontar esas cifras”.
