Canta, miña pedra, canta

Xoán Curiel homenaxea a Antonio Fraguas nos escenarios do programa FalaRedes durante esta primavera.

Xa está aquí unha nova edición do FalaRedes, o programa de dinamización do galego da Secretaría Xeral de Política Lingüística que se centra en ampliar a oferta de ocio na nosa lingua para nenos e non tan nenos en concellos pertencentes á Rede de Dinamización Lingüística, en promover o uso e a valoración positiva do galego e en apoiar os artistas que desenvolven o seu traballo neste idioma.

FaRedes 2019 abriu cunha actividade, Canta, miña pedra, canta, que suma a todos estes obxectivos outro máis: o de renderlle homenaxe ao autor das Letras deste ano. Da man do músico Xoán Curiel, que volve ao programa tras os seus éxitos con Estamos no véran!!! e A casa do terror, e da contadora Charo Pita, FalaRedes ofrece un espectáculo que combina as narracións orais coas cantigas que don Antonio Fraguas, a quen este 2019 se lle dedicará o 17 de maio, recolleu nas súas Aportacións ao Cancioneiro de Cotobade.

Co obxectivo de que o público que ve o espectáculo poida seguir afondando na lectura en galego e no coñecemento do noso patrimonio lingüístico e literario unha vez que a actuación finalice, cada familia asistente recibirá antes de marchar unha pequena antoloxía de narracións tradicionais de Galicia escolmadas por Quique Harquindey e Maruxa Barrio titulada O fillo do rei e outros contos populares.

Dirixido a público de 6 a 12 anos e ás súas familias, Canta, miña pedra, canta, chega esta primavera a 14 concellos da Rede de Dinamización Lingüística: Ames, Arteixo, Boiro, Noia, O Grove,Vilagarcía de Arousa, Cangas, A Estrada, Monterroso, Vilalba, Mondoñedo, Barbadás, Ourense e O Carballiño. E coma sempre no FalaRedes, a entrada é libre e de balde ata completar a capacidade das salas. Toda a información sobre a nova edición xa está dispoñible no Portal da Lingua Galega en www.lingua.gal/FalaRedes.

AXENDA