O mes de marzo comezou no IES Val Miñor (Nigrán) coa cerimonia de entrega deste premio. A galardoada é astrofísica, profesora no Departamento de Física aplicada da Universidade de Vigo e investigadora de prestixio internacional. Ao longo da súa traxectoria participou en varias iniciativas que vinculan a promoción das achegas das mulleres no ámbito da astronomía e a difusión da ciencia entre grupos de alumnado de diversos niveis. Nas dúas anteriores edicións deste galardón recoñeceuse o traballo da bióloga Iria González Vasconcellos e da científica África González.
“Este premio ten un significado especial para min, porque indica que a ciencia é importante para a escola. Este premio non é só para min, porque as persoas non chegamos soas aos sitios, e eu non estaría aquí sen moita xente que me axudou, comezando pola miña propia familia”, comentou a premiada.
Ana Ulla Miguel tamén destacou a necesidade de máis iniciativas de interacción entre as diferentes etapas educativas, que abran a universidade ás escolas e ao revés. Por outro lado, a conselleira de Educación, Carmen Pomar, subliñou durante o acto que “en todos os sistemas educativos europeos a promoción das vocacións STEM é prioritaria, así como avanzar na ruptura da fenda de xénero” e destacou a necesidade de termos aínda máis referentes femininos p”ara demostrar que o xénero non é impedimento para que as rapazas sexan tan boas matemáticas, científicas e tecnólogas como os seus compañeiros”.
