Estudantes xitanos de Secundaria participan na Coruña nesta campaña de sensibilización contra o abandono das aulas.
Estudantes xitanos de Secundaria preséntanse a un casting na Coruña para vivir, por un día, os seus soños profesionais de futuro. Organizado pola Fundación Secretariado Xitano da Coruña, forma parte da nova campaña de sensibilización “Asómate aos teus soños” centrada nos adolescentes xitanos, co obxectivo de loitar contra o abandono prematuro das aulas.
Como xa relatamos anteriormente en Botóns, só dous de cada dez nenas e nenos xitanos que comezan o Ensino Secundario conseguen terminalo. É fronte a eses datos que a Fundación Secretariado Xitano decidiu lanzar a campaña de sensibilización “Xitanos con Estudos, Xitanos con Futuro”. Afirman desde a Fundación que aínda máis neste contexto a crise económica está tendo “un impacto profundo nas persoas xitanas, como parte dos grupos máis desfavorecidos e excluídos”. Nese sentido, subliñan que “hai que apostar máis ca nunca por accións de promoción e inclusión social como esta, centrada en reducir o abandono escolar”. “A educación é a mellor ferramenta para lograr a inclusión social”, salientan.
