Un libro conmemorativo celebra este aniversario de Tanxarina.
A obra de teatro de monicreques “Titiricircus”, posta en escena por Tanxarina Títeres, cumpre 25 anos de representacións. Para festexar o aniversario, a compañía Tanxarina e a editorial Kalandraka colaboraron na edición dun libro conmemorativo que se presentará este sábado 22 de setembro a partir das 19:30 horas no Multiusos da Xunqueira, en Redondela. Durante o acto, aberto ao público familiar, proxectarase o documental “25 anos do Titiricircus”, gravado e producido por Cuchi Carreira.
O deseñador e escenógrafo Pablo Giráldez ‘O Pastor’ ilustra as páxinas de “Titiricircus”, un álbum para nenos e nenas a partir de 5 anos que conta a historia de dous traballadores dun vello circo desaparecido, lembrando os éxitos da súa carreira artística cos seus monicreques. O equilibrista do monociclo, o home máis forte da Península Ibérica, o encantador da serpe Josefina ou o malabarista bailarín son algúns deses entrañables personaxes que fixeron vibrar de emoción a varias xeracións de cativos.
Tanxarina
Andrés Giráldez, Eduardo Alberto Rodríguez ‘Tatán’ e Miguel Borines fundaron Tanxarina en 1983 e especializáronse en espectáculos para público infantil, xuvenil e familiar, combinando varias técnicas de animación de bonecos coa faceta actoral e a relación escénica entre títeres e actores. No ano 2000 comezaron a dirixir o Festival Internacional de Títeres de Redondela, no que actualmente desenvolven a parte artística.
O programa de actividades festivas con motivo do 25 aniversario de “Titiricircus” continuará este domingo día 23. Tanxarina ofrecerá dúas actuacións desta obra, ás 12:30 e ás 20:00 horas na Praza da Torre, en Redondela. En caso de chuvia, as funcións trasladaranse ao Multiusos da Xunqueira, ás mesmas horas.
