Certame que reta os estudantes galegos de Secundaria a demostraren a súa creatividade científica.
O primeiro paso que os estudantes deben dar para participar é formularse unha pregunta á que desexen dar resposta, relacionada con feitos e procesos da vida cotiá, da súa contorna máis inmediata. Despois, co asesoramento dun profesor, deberán deseñar a investigación cientifica que lles permita obter resultados e conclusións.
Esta convocatoria inclúe unha nova modalidade: a categoría educaBarrié, destinada a profesores de Educación Primaria, aos que se convida a presentar proxectos de investigación desenvolvidos cos seus alumnos.
Os alumnos e profesores que desexen participar teñen ata o próximo 5 de febreiro para enviar as súas preguntas. Posteriormente, os admitidos terán 3 meses para desenvolver os seus traballos. A fase final terá lugar na Domus o 8 de xuño de 2013, e a ela concorrerán os cinco mellores traballos seleccionados na modalidade de Secundaria e os tres gañadores na modalidade de Primaria.
O Premio Luís Freire está convocado polo Concello da Coruña (Museos Científicos Coruñeses), en colaboración coa Asociación de Amigos da Casa das Ciencias, El Corte Inglés e a Fundación Barrié, a través da súa iniciativa educativa educaBarrié.
Máis información: Como participar
