Non puideches asistir en directo á xornada de Ponte nas Ondas? Os contidos de “Ponte a contar” seguen en liña!
A xornada de comunicación interescolar de Ponte nas Ondas foi emitida o pasado 1 de xuño a través da web da asociación. Mais, se non puidestes seguila daquela, lembrámosvos que os contidos desta XVIII edición seguen dispoñibles en rede. Unha oportunidade para contemplar á carta a programación preparada desde os centros educativos ao longo do presente curso para ser compartida e intercambiada a través desta xa consolidada xornada.
Co acento galego do narrador Celso Sanmartín e o sutaque da narradora brasileira Clara Haddad arrancou a presentación da xornada, destacando desde o comezo a importancia que ten a narración oral e o conto popular. A seguir comezou a produción dos centros educativos. Desde Braga, o externato Paulo VI fixo exhibición técnica audiovisual ao mostrar a técnica do croma no seu vídeo. O IES Alexandre Bóveda de Vigo aportou unha narración audiovisual de poemas con acompañamento musical. Carlos Blanco abriu a quenda dos narradores orais explicando a súa vinculación con Ponte…nas ondas! lembrando a súa colaboración nas presentacións da Candidatura da Tradición Oral Galego-Portuguesa á UNESCO por Europa. A seguir viñeron outros narradores e narradoras de todo o mundo.
A lareira de contos foi o suxerente título do programa realizado polo colexio Sequelo de Marin. A escola é tamén o lugar onde se poden contar contos, como así o fai o colexio Infante Felipe de Salvaterra. As lendas tamén son contadas moitas veces como contos ou narracións fantásticas como así o fan os alumnos da Escola Diogo Bernardes de Ponte da Barca ou os da escola de Briteiros de Guimarães. A escola profesional de Melgaço lembra a figura dos “tesouros vivos”, depositários da memória dos contos.
O IES A Sangriña de A Guarda e a escola Secundária de Caminha, con máis de 10 anos realizando programa conxunto achegan os contos das dúas beiras do Miño. E así seguen os programas tamén chegados da outra beira do Atlântico como a escola de Villa Clara de Cuba, o colégio Gimnasio Del Norte de Bogotá ou o Colégio Pedro II de Rio de Janeiro, con quen Ponte…nas ondas! acaba de subscribir un convenio de colaboración.
Todo este magnífico material, accesible na web de Ponte nas Ondas.
