Como cada ano desde 2007, o movemento asociativo celebra o Día Mundial de Concienciación sobre o Autismo, coa meta de sensibilizar a sociedade sobre este tipo de trastorno e promover a inclusión social das persoas con Trastorno do Espectro do Autismo (TEA).
“Neste Día Mundial de Concienciación sobre o Autismo, insto a que se promovan os dereitos das persoas con autismo e asegúrese a súa plena participación e inclusión, como membros valiosos de nosa tan diversa familia humana, para que poidan contribuír a crear un futuro de dignidade e oportunidade para todos”, asina a mensaxe do Secretario Xeral das Nacións Unidas, Ban Ki-moon, para este 2 de abril de 2016.
Mensaxes clave da campaña da Confederación Autismo
- O 1% da poboación mundial ten autismo. Hoxe en día, moita xente coñece o autismo pero só uns poucos saben o que significa realmente vivir con autismo.
- Comprender as persoas con autismo é o primeiro paso cara á creación dunha sociedade máis inclusiva e accesible.
- Pode parecer que as persoas con autismo teñen comportamentos inusuais.
- As persoas con autismo poden albergar moitas habilidades e talentos, a clave é saber como empregalos para permitir que as persoas con autismo alcancen o seu pleno potencial.
- Pensa como podes facer que a túa comunidade/traballo/escola sexa máis acolledora co autismo e dálle ás persoas con autismo a oportunidade de mostrar o seu verdadeiro potencial.
Tema de 2016: “O autismo e a Axenda 2030: inclusión e neurodiversidade”
O autismo e outras formas de discapacidade son parte da experiencia humana que contribúe á diversidade humana. Por iso, as Nacións Unidas fan fincapé na necesidade de incorporar a discapacidade na axenda de desenvolvemento da Organización. Para incorporar a discapacidade é necesario adoptar un enfoque integral na formulación, execución, seguimento e avaliación de políticas e programas en todas as esferas políticas, económicas e sociais, a fin de que non se perpetúe a desigualdade.
En setembro de 2015, a Asemblea Xeral das Nacións Unidas aprobou a nova Axenda 2030 para o Desenvolvemento Sustentable, un programa ambicioso que inclúe 17 Obxectivos de Desenvolvemento Sustentable (ODS) e 169 metas que prometen que ninguén quedará atrás.
A pesar de que todos os ODS son de aplicación universal, os seguintes Obxectivos fan referencia explícita á discapacidade e as persoas con discapacidade:
4) Garantir unha educación inclusiva e equitativa de calidade e promover oportunidades de aprendizaxe permanente para todos;
8) Promover o crecemento económico sostido, inclusivo e sustentable, o emprego pleno e produtivo e o traballo decente para todos;
10) Reducir a desigualdade nos países e entre eles;
11) Lograr que as cidades e os asentamentos humanos sexan inclusivos, seguros, resilientes e sustentables; e…
17) Fortalecer os medios de implementación e revitalizar a Alianza Mundial para o Desenvolvemento Sustentable.
As celebracións deste ano orientaranse cara ao ano 2030 e faranse eco dos novos ODS e das consecuencias que traerán consigo e que mellorarán a vida das persoas con autismo.
Na man de cidadanía e administracións está que estes obxectivos non queden no papel e sexa posible transformar a realidade.
