De libre visionado na rede, unha peza audiovisual froito da cooperación entre comunidades de linguas minorizadas.
‘Documental Tosta, ruta atlántica da diversidade lingüística’ fai un percorrido por sete linguas minorizadas; galego, vasco, frisio, galés, gaélico escocés, irlandés e córnico, reunidas arredor da palabra común “Tosta” para compartir os nosos mundos e para atopar xeitos de dar alento ás linguas.
O documental foi presentado ao público o pasado 20 de setembro pola Mesa pola Normalización Lingüística, coincidindo co Día Europeo das Linguas. Tosta reivindica a diversidade lingüística desde o punto de vista das linguas minorizadas, concretamente do galego, o vasco, o galés, o frisio, irlandés, gaélico escocés e córnico.
A Mesa é precisamente a representación galega no proxecto Tosta, promovido dentro da programación de Donostia 2016, Capital Europea da Cultura. Alén do documental, tamén se fixo entrega e presentación do libro Unha guía imperfecta (.pdf) que ofrece unha proposta práctica para axentes culturais que traballan en proxectos internacionais e queren promover prácticas de xestión respectuosas coas linguas minorizadas.