O Instituto Jane Goodall celebra desde este martes 26 de xaneiro o Mes Internacional da Reciclaxe de Móbiles cunha “chamada á acción” para concienciar sobre o uso de “minerais de sangue” que proveñen de zonas en conflito, e apoiar mediante a reciclaxe de móbiles a proxectos educativos e de conservación en África.
Con esta iniciativa a organización global fundada pola primatóloga inglesa Jane Goodall promove a reflexión cidadá sobre a nosa alta demanda tecnolóxica de certos minerais escasos como a casiterita e o coltán, cuxa explotación ilegal serviu para financiar a grupos guerrilleiros na República Democrática do Congo, protagonistas dun conflito que produciu máis de 5 millóns de vítimas, millóns de refuxiados e incontables abusos dos dereitos humanos, así como un gran dano ambiental e aniquilamento de fauna en perigo de extinción.
En España, hai máis de 50 millóns de liñas de móbiles activas para pouco máis de 40 millóns de usuarios adultos, e habendo unha baixa taxa de reciclaxe, estímase que pode haber ata 100 millóns de móbiles en desuso gardados nos fogares, o cales poderían ser reciclados para ser reutilizados noutros países ou para aproveitar as materias primas e reducir a súa demanda de zonas en guerra. A nivel mundial, alcanzouse a cifra de 7 billóns de móbiles en uso.
O Día Internacional da Reciclaxe de Móbiles (www.mobilerecyclingday.org) é unha iniciativa dos Institutos Jane Goodall do mundo, entre os cales se atopan España, Estados Unidos, Canadá, Países Baixos, Francia, Bélxica, Chile e Australia. Nos devanditos países, a partir deste día redobraranse esforzos para concienciar sobre o impacto ambiental e social da explotación de “minerais de sangue” usados na fabricación de teléfonos móbiles, alongar a vida útil dos nosos terminais, facilitar canles gratuítas de reciclaxe e financiar proxectos educativos e de conservación en Congo, RDC e Senegal.
A nivel estatal o Instituto Jane Goodall creou a súa propia campaña de reciclaxe e sensibilización, chamada “Mobilízate pola selva” e xestionada por voluntari@s, a través da cal cidadáns, escolas, empresas e outras entidades poden doar os seus móbiles en desuso con envío ou recollida gratuíta. Ao mesmo tempo pódense gañar apadriñamentos dos chimpancés rescatados en Tchimpounga, o maior Centro de Rehabilitación chimpancés de África, xestionado polo Instituto Jane Goodall en Congo. A campaña do IJGE logrou reciclar xa máis de 58.000 terminais e seguirá vixente ao longo do ano. Os interesados en participar na mesma poden visitar a web www.movilizateporlaselva.org
A doutora Jane Goodall, Mensaxeira da Paz de Nacións Unidas, Premio Príncipe de Asturias 2003 e Premio Internacional Cataluña 2015, expresou o seu apoio a esta iniciativa global e apelou á empatía e a responsabilidade cidadá, xa que “como consumidores podemos marcar unha gran diferenza coa nosa elección de compra e o alongamento da vida útil dos nosos teléfonos, promovendo a reciclaxe dos mesmos e a redución da demanda de recursos extraídos ilegalmente, moitas veces utilizando man de obra forzada ou infantil, ou en condicións de gran inseguridade e precariedade, destruíndo ao mesmo tempo zonas que son hábitats de especies en perigo de extinción como os chimpancés e os gorilas”. A doutora Goodall recalcou que “cada un de nós marca unha diferenza cada día coas nosas accións, e debemos decidir que tipo de impacto (positivo ou negativo) queremos ter no mundo”.
